បាត់ដំបង៖ កម្លាំងជំនាញនៃអធិការដ្ឋាននគរបាលស្រុកថ្មគោល ខេត្តបាត់ដំបងក្នុងពេលចុះធ្វើបច្ចុប្បន្នភាពតាមផ្ទះសំណាក់នៅក្នុងភូមិសាស្ត្រស្រុកដើម្បីស្រាវជ្រាវរកអ្នកដែលមកស្នាក់នៅក្នុងគោលបំណងធ្វើចំណាកស្រុកដោយខុសច្បាប់បានឃាត់ខ្លួនជនសង្ស័យពីរនាក់ប្ដីប្រពន្ធ និងមនុស្ស១០នាក់ទៀតដែលបម្រុងឆ្លងដែនខុសច្បាប់ទៅកាន់ប្រទេសថៃ។
ជនសង្ស័យជាមុខសញ្ញាប្តីប្រពន្ធចំនួន០២នាក់នោះ ប្ដីមានឈ្មោះ តា ញ៉េន ហៅ ភាព អាយុ ៣៦ឆ្នាំ និងប្រពន្ធឈ្មោះ ហាន ស្រីណុច អាយុ ៣១ឆ្នាំ អ្នកទាំងពីររស់នៅភូមិតាគ្រាប ឃុំព្នៅទី១ ស្រុកស៊ីធរកណ្តាល ខេត្តព្រៃវែង ត្រូវបានឃាត់ខ្លួននៅម៉ោង០៦និង៣០នាទី ថ្ងៃទី២៩ ខែតុលា ឆ្នាំ២០២១ នៅផ្ទះសំណាក់មួយកន្លែង ស្ថិតក្នុងក្រុមទី០៦ ភូមិគោកត្រប់ ឃុំតាម៉ឺន ស្រុកថ្មគោល។
ក្នុងពេលឃាត់ខ្លួននោះ សមត្ថកិច្ចក៏បានឃាត់ខ្លួនមនុស្សចំនួន១០នាក់ផ្សេងទៀតដែលត្រូវ២នាក់ប្ដីប្រពន្ធខាងលើបម្រុងលួចនាំឆ្លងដែនទៅកាន់ប្រទេសថៃផងដែរ។
ក្រោយពីឃាត់ខ្លួនជនសង្ស័យនិងជនរងគ្រោះត្រូវបានសមត្ថកិច្ចជំនាញបញ្ជូនទៅអធិការដ្ឋាននគរបាលស្រុកថ្មគោលដើម្បីធ្វើការសាកសួរនិងអនុវត្តតាមនីតិវិធី៕
